001 Es hott Blatz gnumme in de Daagge vum Ahasveros, daer es Keenich waar vun India bis an Ethiopia iwwer en hunnert unn siwwenunnzwansich Lender.

002 An selli Zeit hott der Keenich Ahasveros uff seim Keenichschtuhl ghockt in die Keenichschtadt Susa.

003 Im dridde Jaahr vun sei Keenichreich hott er en grooss Esse gmacht fer sei vedderschti unn sei ewwerschti Gnechte. Die Griekshauptmenner vun Persia unn Media, unn die Rulers unn Ewwerschti vun aal sei Lender waare datt.

004 Fer en hunnert unn achtizch Daag hott der Keenich die Leit sehne glosst wie reich es sie Keenichreich iss unn wie mechtich es sei keenichi hallichkeit iss.

005 Wo selli Daagge ferbei waare hott der Keenich en grooss esse gmacht im Hof vum Keenichhaus es siwwe Daagge lang waar. Dess waar fer aal die Leit, vum heechschte zum nidderschte, es in die Keenichschtatt Susa waare.

006 Der Hof waar ausgedeckt mit weissi unn blooi Curtains es nuff gebunne waare zu Silwer Rings an de Marbel Poschte mit purpeli Schtrick gmacht vun fei Linnen. Es waare silwerichi unn goldichi Sitze uff em geteilde Bodde. Die Teils waare gmacht vun keschtlichi Schteh mit edlich Kollers - rood, weis, grie unn schwatz.

007 Der Wei waar gedrunke in alli Sadde golidichi Koblen, kens vunne gleiche. 'S waar viel Keenichwei fer drinke unn der Keenich waar nett geitzich mit.

008 Bei em Keenich sei Gebott hott jeder wann drinke kenne wie er hott welle. Der Keenich hott sei Gnechte es Acht gewwe henn uff der Wei, gsaat fer der Wei ausdehle wie alliebber's hawwe will.

009 Die Keenichfraa Waschti hott aa en grooss Esse gmacht fer die Weibsleit im Keenich Ahasveros sei Keenichhaus.

010 Uff em siwwede Daag wo der Keenich in em guder Mut waar vum Wei, hott er sei siwwe Kammergnechte bei grufe es ihm abgwaart henn. Dieh waare der Mehuman, der Bistha, der Harbona, da Bigtha, da Abagatha, da Sethar, unn da Karkas.

011 Er hott ihne gsaat fer die Keenichfraa Waschti rei bringe am ihre Keenichkroon weare. Er hott welle hawwe es die Leit unn die ewwerschti sehne kenne wie schee es sie iss, weil sie aarich schee waar.

012 Awwer wo die Gnechte em Keenich sei Watt zu die Keenichfraa Waschti gewwe henn, hott sie's nett geduh fer kumme. No iss der Kennich gliedich bees wadde unn sei Zann hott gebrennt in ihm.

013 Weil der Keenich gweenlich als gschwetzt hott mit sei Raatgewwer, Menner es Weisheit ghatt henn weggich die Sache vum Keenichreich, es Gsetz unn Leit ihre Recht, dann hott er gschwetzt zu dieh Menner mit Weisheit.

014 Selli es er's Menscht dezu gange iss fer ihm Raat gewwe waare der Karshena, da Shethar, da Admatha, da Tharsis, da Meres, da Marsena unn da Memucan. Sie waare die siwwe ewwerschti vun Persia unn Media unn waare oft alaabt fer nei geh zum Keenich. Sie waare die heechschte Menner im Keenichreich.

015 Der Keenich hott gsaat zu dieh Menner, "Was saagt's Gsetz es geduh sei soll zu die Keenichfraa Waschti? Ich, der Keenich Ahasveros, hab mei Kammergnechte zu ihre gschickt mit en Gebott, unn sie hott's nett geduh fer's halde."

016 No hott der Memucan gsaat vannich em Keenich unn aal die ewwerschte, "Die Keenichfraa Waschti hott letz geduh, nett juscht zum Keenich awwer zu aal die ewwerschti unn aal die Leit im Keenich Ahasveros sei Lender iwweraalich.

017 Was die Keenichfraa geduh hott watt ausgfunne bei aal die Weibsleit, no zeele sie ihre Menner verachte unn saagge, 'Der Keenich Ahasveros hott en Gebott gewwe zu die Keenichfraa fer zu ihm kumme awwer sie hott's nett geduh.'

018 Heit zeele die Weibsleit vun Persia unn Media, dieh es gheert henn was die Keenichfraa geduh hott, der seem Weeg schwetze zum Keenich sei ewwerschti, no zeelt's viel Verachtes unn Zann sei.

019 Nau wann's em Keenich gfallt, loss ihn en Keenichsgebott mache unn loss es uffgschriwwe sei im Gsetz vun Persia unn Media so es es nett verennert sei kann. Dess soll saagge, es die Waschti nie nimmi vannich der Keenich Ahasveros kumme darref, unn es der Keenich ihre keenicher Blatz zu ebber schunscht gebt es besser iss es sie.

020 No wann em Keenich sei Gebott moll gheert watt gans deich sei grooss Keenichreich, dann zeele die Weibsleit ihre Menner achte, vum greeschte zum glenschte.

021 Der Keenich unn sei ewwerschti waare froh fer der Raat vum Memucan, so hott der Keenich geduh wie der Memucan gsaat hott.

022 Er hott no en Schreiwes naus gschickt zu alli Lender in seim Keenichreich, zu alli Land in ihre eegni Schprooch unn Schreiwes. Dess Schreiwes saagt es alli Mann soll der Iwwersehner sei in sei eegge Haus.