001 Schpeeder wo em Keenich Ahasveros sei Zann sich gleegt ghatt hott, hott er an die Waschti gedenkt unn was sie geduh ghatt hott unn was er gebodde ghatt hott weggich ihre.

 

002 No henn em Keenich sei Gnechte es abgwaart henn uff ihn, gsaat zu ihm, "Loss scheeni jungi Meed gsucht sei fer der Keenich.

 

003 Der Keenich kann Iwwersehner mache in alli Land vun sei Keenichreich fer die scheeni jungi Meed zammer bringe in's Weiwerhaus in die Keenichschtadt Susa. Loss sie aal unnich em Hegai, em Keenich sei Kammer-gnecht, sei, daer es Acht gebt uff die Weibsleit. Loss gutschmackich Eel gewwe sei zu ihne fer sie schee mache.

 

004 No loss es Meedel es em Keenich gfallt die Keenichfraa sei in Blatz vun die Waschti." Daer Raat hott em Keenich gfalle unn er hott's ausgfiert.

 

005 Nau's waar en Jutt in die Keenichschtadt Susa es Mordecai gheese hott. Er waar vum Benjamin sei Gschlecht unn waar em Jair sei Buh. Der Jair waar em Simei sei Buh unn der Simei waar em Kis sei Buh.

 

006 Der Mordecai waar eens vun selli es weck gnumme gwest waar vun Jerusalem, wo der Keenich Nebukadnezar vun Babylon, der Keenich Jechonia vun Juda, weck gfiert hott.

 

007 Der Mordecai hott en Cousin ghatt es Hadassa gheese hott. Er hott die Hadassa uffgezogge weil sie ken Daett odder Maem ghatt hott. Sie hott aa Esther gheese unn sie waar aarich schee. Der Merdecai hott sie aagnumme wo ihre Maem unn Daett gschtarrewe sinn.

 

008 Wo em Keenich sei Gebott unn Gsetz bekannt gmacht waar, sinn viel jungi Meed rei gebrocht wadde an's Keenichhaus in Susa unn waare unnich der Hegai geduh. Die Esther waar aa zum Keenich sei Haus gnumme unn waar unnich der Hegai geduh, daer es Acht gewwe hott uff's Weiwerhaus.

 

009 Die Esther hott em Hegai gfalle unn er waar gut zu ihre. Er hott ihre Schtoft gewwe fer sie schee mache unn aa gut Esssach. Er hott ihre siwwe Maade gewwe vum Keenichhaus unn hott sie unn ihre Maade in der bescht Blatz im Weiwerhaus geduh.

 

010 Die Esther hott nimmand gsaat weggich ihre Leit odder Freindschaft, weil der Mordecai ihre gsaat ghatt hott es sie nichs saagge soll dewegge.

 

011 Der Mordecai iss alli Daag zerick unn verdi gloffe neekscht am Weiwerhaushof fer ausfinne wie die Esther waar unn was am gewwe waar mit ihre.

 

012 Eb en Meedel zum Keenich Ahasveros geh hott kenne hott hott sie missa zwelf Munet die Sache deich geh es sie schee gmacht hott. Fer sechs Munet waar sie gsalbt mit Eel vun Myrrhe unn sechs Munet mit Balsameel unn annri Schpeises unn anner gutschmackich Eel.

 

013 Wo mol die Zeit kumme iss fer en jung Meedel zum Keenich geh hott sie ennich ebbes grickt es sie hawwe hott welle fer mit sich nemme vum Weiwerhaus zum Keenichhaus.

 

014 Oweds iss sie nei gange unn da nekscht Meigge iss sie zerick gange zu en anner Deel vum Weiwerhaus es der Saasgas, em Keenich sei Kammergnecht, Acht gewwe hott druff. Er hott iwwer em Keenich sei Neeweweibwer gwatscht. En Meedel iss nett zerick zum Keenich gange unni es sie ihm gfalle hott unn er sie zerick gfoddert hott bei Naame.

 

015 Nau wo's der Esther ihre Zeit waar (dess iss es Meedel es der Mordecai aagnumme hott, unn es seim Uncle Abihail sei Meedel waar) fer nei geh zum Keenich, hott sie juscht gfraagt fer mit sich nemme was der Hegai ihre gsaat hott. Der Hegai waar em Keenich sei Kammergnecht es iwwer's Weiwerhaus waar. Unn die Esther waar gut aagsenne bei alliebber es sie gsenne hott.

 

016 Sie waar zum Keenich Ahasveros gnumme im Keenichhaus im zehede Munet, der Munet vun Tabeth, im siwwede Jaahr vun sei Keenichreich.

 

017 Nau der Keenich hott die Esther lieb ghatt, meh es aal die annre Weibsleit, unn sie hott sei Gnaat unn Bamhatzichkeit gwunne, meh es aal die annre jungi Meed. So hott er en keenicher Kron uff ihre Kobb geduh unn hott sie die Keenichfraa gmacht in Blatz vun die Waschti.

 

018 No hott der Keenich en grooss Esse gmacht fer aal sei vedderschti unn ewwerschti Gnechter fer die Esther ehre. Er hott en Feierdaag ausgewwe unn Keenichgschenker freiwillich ausgewwe.

 

019 Wo die junge Meed's zwett Maal zammer gebrocht waare, waar der Mordecai am Keenich sei Dor ghockt.

 

020 Die Esther hott nimmand gsaat weggich ihre Leit odder Freindschaft, graad wie der Mordecai ihre gsaat hott fer duh. Sie hott aaghalde duh wie der Mordecai sie glannt hott, graad wie sie geduh hott deweil es er sie uffgezogge hott.

 

021 Deweil es der Mordecai als am Keenich sei Dor ghockt hott, sinn zwee vum Keenich sei hoochi Kammergnechte, der Bigthan unn der Teresh, bees wadde unn henn grischt fer der Keenich Ahasveros doot mache. Sie waare Dorhieder am Keenich sei Dor.

 

022 Awwer der Mordecai hott ausgfunne devun, unn er hott der Keenichfraa Esther dess gsaat, unn sie hott em Keenich gsaat was der Mordecai gsaat hott.

 

023 Wo dess nooch gsucht iss wadde, unn's iss ausgfunne wadde es dess waar gwest waar, henn sie die zwee Menner ghanke uff die Galje. Dess waar alles nunner gschriwwe im Chronikbuch vannich em Keenich.