001 Nochdem hott der Keenich Ahasveros der Haman heecher gsetzt in sie Keenichreich. Er hott ihm en Schtuhl gewwe iwwer aal die annre vedderschti Gnechte. Der Haman waar em Hammedatha sei Buh vun die Noochkummeschaft vum Agag.

 

002 Aal die annre vedderschte Gnechte am Keenich sei Dor henn sich nunner gebickt unn henn em Haman Ehr gewwe, weil der Keenich so en Gebott gewwe ghatt hott. Awwer der Mordecai hott sich nett nunner gebickt unn hott ihm nett die Ehr gewwe.

 

003 No henn em Keenich sei Gnechte am Keenich sei Dor der Mordecai gfroogt, "Ferwas duscht du em Keenich sei Gebott iwwerdredde?"

 

004 Daag noch Daag henn sie gschwetzt zu ihm, awwer er hott's nett geduh fer sie abharriche. No henn sie em Haman dess gsaat fer sehne eb er's schtend was der Mordecai am duh iss, weil er ihne gsaat ghatt hott es er en Jutt iss.

 

005 Wo der Haman gsenne hott es der Mordecai sich nett nunner bickt unn ihm Ehr gebt, waar er gliedich bees.

 

006 Wo er ausgfunne hott es der Mordecai en Jutt waar, hott er ausgmacht fer nett juscht der Mordecai schtroofe, awwer er hott geguckt fer en Weeg es er aal sei Leit die Judde dood mache kann, gans deich em Ahasveros sei Keenichreich.

 

007 Im ersche Munet, sell iss da Munet Nisan, im zwelfscht Jaahr vum Keenich Ahasveros sei Reich, henn sie's Loos gezogge es Pur heest.

 

008 No hott der Haman zum Keenich Ahasveros gsaat, "Es hott en Satt Leit es sich weck halde vun annri, unn es gans iwwer dei Keenichreich gschtroit sinn. Ihre Gsetz iss nett's seem es sell vun aal die annre Leit, unn sie duhn's nett fer em Keenich sei Gsetze halde. Der Keenich waer besser ab wann er nett uff duh deed mit ihne.

 

009 Wann's em Keenich gfallt, loss en Gebott uffgschriwwe sei es sie aal dood gmacht sei selle. Ich duh drei hunnert unn fimf unn siwwetzich Tons Silwer im Keenich sei Geldschtubb fer die Menner es dess ausdraagge selle."

 

010 So hott der Keenich der Ring mit sei Seal vun seim Finger gnumme unn hott en zum Haman gewwe. Der Haman waar em Hammedatha sei Buh vun die Noochkummeschaft vum Agag, unn waar die Judde ihre Feind.

 

011 Der Keenich hott no gsaat zum Haman, "Es Geld iss gewwe zu dir, unn aa die Leit. Duh mit ihne wie's dir gfallt."

 

012 No uff em dreizeede Daag vum erschte Munet waare em Keenich sei Schreiwer bei grufe. Sie henn nunner gschriwwe was der Haman ihne gsaat hott unn henn's iwwergsetzt in die Schprooch unn's Schreiwes vun aal die Leit im Keenichreich. Dess waar naus gschickt zum Keenich sei Rulers unn Gowweners es iwwer jeder Land waare, unn zu die ewwerschte vun all die Leit. Dess Schreiwes waar gschriwwe im Keenich Ahasveros sei Noome unn waar gsealt mit em Keenich sei ring.

 

013 Dieh Briefe waare gedraagge bei Mailmenner zu aal em Keenich sei Lender mit em Gebott fer aal die Judde umbringe, sie dood mache unn sie gans ausreiwe. Dess hott alliebber eignumme, jung unn alt, Weibsleit unn glenni Kinner; unn hott selle Blatz nemme in ee Daag, der dreizeet Daag vum zwelfde Munet Adar. Sie henn aa selle alles nemme es zu die Judde gheert hott.

 

014 En Gleichnis vun dem Schreiwes waar gewwe zu alli Land unn hott selle die Laa wadde datt. Es waar bekannt gmacht iwweraalich zu aal die Leit so es sie sich rischte henn kenne fer seller Daag.

 

015 Weil der Keenich dess Gebott gewwe ghatt hott, sinn die Mailmenner naus iwwer's Land gange, unn's Gebott waar aa bekannt gmacht in die Keenichschtadt Susa. Der Keenich unn der Haman henn sich anne ghockt fer drinke, awwer dit Schtadt Susa waar verschtertzt.